«Қазақстанды таныту» тележобасы «Қазақстан» ТРК» АҚ мен «Хабар» агенттігі» АҚ телеарналарының эфирлерінен Наурыз мерекесі күндерінен бастап беріле бастаған, он бейнероликтен тұратын хабарлар циклі болып табылады. Ұзақтығы екі минуттан аспайтын бұл жобада қазақ халқының мәдениеті, өнері, дәстүрі дәріптеледі.

Жоба негізінен өскелең ұрпақтың бойына ұлттық құндылықтарды сіңіріп, оларға тәлім-тәрбие беруге негізделген. Бейнероликтердің басты ерекшелігі – көркем бейнетүсірілім мен графиканың, арнайы әдістердің және қызықты деректердің өзара үйлесімі.

Жобадағы тақырыптар сан алуан: мұнда асық ату ойнынан бастап, аса бай қазақ тілінің тарихы, жазба тілі қамтылған, қазақтың қазақтығын танытатын музыкалық аспабы – домбыраның жасалу көріністері, сондай-ақ, қобыз аспабының ерекшеліктері, ұлттық дәстүр – айтысты айрықшаландыратын көріністер де беріледі. Бұл жобадан сонымен қатар, қазақ күресі, сүндет той, ұлттық сусынымыз - қымыздың шипалық қасиеттері туралы да мағлұматтар ала аласыз.

---